Mauro Staraj nakon gostovanja Desingerice napisao pjesmu “E, moj Drago”

Nastup Desingerice u opatijskom klubu Drago koji se nalazi u sklopu Centra Gervais izazvao je ogroman interes javnosti, a čak je potaknuo i Maura Staraja da o svemu napiše jednu pjesmu.

“Inspirirana raznoraznemi Desingerica likovima i životon va 2023. lete, danas jutro je moja leva ruka sama počela pisat po kuse karti i va par minuti napisala:

E, MOJ DRAGO

E moj Drago, da ovo vidiš
ne bi ti bilo drago.

Prišli su tati,
lenobarija i neka falša bogatija
ni ovo više ni tvoja
a ni naša Opatija

Ognjišći j’ se manje,
još malo kade oganj gori
tu i tamo ki po našu se oglasi
da nan se zajik posensega ne pogasi.

I javorik je se manje
I barčic i maruni, oneh debeleh, plovanskeh
Ni ni mlekaric ni onega tvojega morskega žala
rovinali su nan nekidan tri počivala

E moj Drago, da ovo vidiš
ne bi ti bilo drago.

I judi j’ se manje
promenile su se užanci
i već let se ne hodi
pul Guća na tanci.

Ni nonića ni njegove pipi već ni
nestale su lešice, ženice i beli putići
a mesto kućic sada su kocke sive
z dritemi, a ne črjenemi krovići

E moj Drago, da ovo vidiš
ne bi ti bilo drago.

Jedino Morčić još se ne da
i čera je vranić va kuću prišal
i koliko san se obrnul
z vetrini je meso ukral

Magari san se rodil puno kašneje
nego ča si ti Zgoru šal
evo, malo san ti se potužil
aš vavek se ćutin – ko da san te poznal.

I zato san siguran va sako slovo
i čistega srca govorin ti ovo:
E moj Drago, da ovo vidiš,
ne bi ti bilo drago.”